غزل
رگھوپتی سہائے
منگل، 21 اپریل 2026
👁 13
❤️ 1
ستاروں سے الجھتا جا رہا ہوں
شب فرقت بہت گھبرا رہا ہوں
ترے غم کو بھی کچھ بہلا رہا ہوں
جہاں کو بھی سمجھتا جا رہا ہوں
یقیں یہ ہے حقیقت کھل رہی ہے
گماں یہ ہے کہ دھوکے کھا رہا ہوں
اگر ممکن ہو لے لے اپنی آہٹ
خبر دو حسن کو میں آ رہا ہوں
حدیں حسن و محبت کی ملا کر
قیامت پر قیامت ڈھا رہا ہوں
خبر ہے تجھ کو اے ضبط محبت
ترے ہاتھوں میں لٹتا جا رہا ہوں
اثر بھی لے رہا ہوں تیری چپ کا
تجھے قائل بھی کرتا جا رہا ہوں
بھرم تیرے ستم کا کھل چکا ہے
میں تجھ سے آج کیوں شرما رہا ہوں
انہیں میں راز ہیں گلباریوں کے
میں جو چنگاریاں برسا رہا ہوں
جو ان معصوم آنکھوں نے دیے تھے
وہ دھوکے آج تک میں کھا رہا ہوں
ترے پہلو میں کیوں ہوتا ہے محسوس
کہ تجھ سے دور ہوتا جا رہا ہوں
حد جور و کرم سے بڑھ چلا حسن
نگاہ یار کو یاد آ رہا ہوں
جو الجھی تھی کبھی آدم کے ہاتھوں
وہ گتھی آج تک سلجھا رہا ہوں
محبت اب محبت ہو چلی ہے
تجھے کچھ بھولتا سا جا رہا ہوں
اجل بھی جن کو سن کر جھومتی ہے
وہ نغمے زندگی کے گا رہا ہوں
یہ سناٹا ہے میرے پاؤں کی چاپ
فراقؔ اپنی کچھ آہٹ پا رہا ہوں
✍️ رگھوپتی سہائے — مختصر تعارف
📍 گورکھپور، اتر پردیش (ہندوستان)
فراق گورکھپوری کی سوانح حیات (مکمل اور جامع)
🟢 تعارف
فراق گورکھپوری اردو کے ممتاز شاعر، نقاد اور ادیب تھے۔
ان کا اصل نام: رگھوپتی سہائے تھا، جبکہ تخلص “فراق” تھا۔
وہ اردو غزل کو جدید رنگ دینے والے بڑے شاعروں میں شمار ہوتے ہیں۔
📍 پیدائش اور خاندانی پس منظر
📅 پیدائش: 28 اگست 1896ء
📍 مقام: گورکھپور، اتر پردیش (ہندوستان)
والد: منشی گورکھ پرساد (ایک عالم اور ادیب)
ان کا تعلق ایک تعلیم یا …
غزل کیا ہے؟
غزل اردو شاعری کی سب سے مقبول صنف ہے۔ اس میں عام طور پر محبت، جدائی، فلسفہ اور زندگی کے موضوعات پر اشعار ہوتے ہیں۔ ہر شعر اپنی جگہ مکمل ہوتا ہے۔
رگھوپتی سہائے کی مزید
ستاروں سے الجھتا جا رہا ہوں
شب فرقت بہت گھبرا رہا ہوں
ترے غم کو بھی کچھ بہلا رہا ہوں
جہاں کو بھ...
ابھی کوئی تبصرہ نہیں — پہلے تبصرہ کریں!