ضرورت ایک ایسا عنصر ہے جو ہر جنس و انس میں پایا جاتا ہے اس کی موجودگی تعلق و ربطگی کی علامت ہے اسی کے باعث محبت جنم لیتی ہے اسی کے سبب نفرت مولود ہوتی ہے باعِثِ امن بھی یہی ہے باعِثِ جنگ بھی یہی اسی کی وجہ سے جذبات و احساسات سے شناسا ہوئے، یہی وہ پگڈنڈی ہے جو احساس کے سرے سے حساسیت کے سرے سے ہمیں جوڑتی ہے اسی سے ہم میں وفا کا جز جفا کا جز پیدا ہوتا ہے یہی درد و غم دکھ رنج و الم کا زینہ ہے یہی خوشی کی شمع بھی ہے یہی منتظِر، اور منتظَر کا موضوع ہے اسی کی موجودگی سے ہم نے قرینۂِ حیات کو الگ الگ پہلو سے دیکھا اسی کی آہنگ نے ہمیں بیدار و بیزار کیا یہی ہر کام میں جلد بازی کرنے پر مجبور کرتی ہے یہی سستی کا باعث بھی ہے اسی نے بنجر زمین کو سبز و شاداب کرنے کی صلاحیت دی